خروج عن النص _ إحكي وفضفض

احكي وفضفض
وكمان فضفض واحكي ايا اشي ممكن يريحك المفروض انه يريحك بس شو الفايدة بتيجي تا تفضفض وترتاح بتزيد همومك وبدال البكاء بتصيبك حالة من النُباح المستعصي

يعني انا مثلا بيجي على بالي انا مش على بال اي حدا ثاني لأنه بالي الي مش الك ولا الها
بيجي على بالي افضفض واحكي وسب على ايا مسئول مًعين – حًر انا مش هاي دولة احكي وفضفض
لا انا بحب احكي سياسة ولا سفاله
انا بحب افضفض عن الوضع الراهن ... بديش احكي عن الرهائن ولا عن كوسوفو ولا عن غواتنامو ولا إن ما نامو انا مش عم انام اصلاَ
المهم يا سيد بيجي على بالي اقعد هون بين الشباب والصبايا افرفد وافضفض واقول انه مثلا الوضع مش عاجبني ويجي سين من الاشخاص يشاركني رأيه بالنسبة للموضوع يعني بجوز يخفف علي من منطلق انه اللي بشوف مصيبة غيره بتهون عليه مصيبتة
يعني على قولة المثل الاعور ببلد العميان ملك ما حدا قدة

باجي انا وبالي هون لحتى احكي عن الوضع مع اني بفهمش بأي وضع بدي احكي بقراء العناوين كلها ولا يا سيد كلها داقة ببعض
طب بقول هسا إذا انا بدي اسب على الوزير ولا المسئول بجوز يتحول موضوعي لمسيحي ومسلم او أردني فلسطيني
طب مهو المسئول شو بدو يكون يعني من عالم اخر يا بدو يكون من من الاولانين أو الثانين طب والحل يعني مافي طريقة افضفض فيها انا كمواطن مالي بالسياسة ولا بالأقتصاد لأ ليش الكذب السياسة مبينة واحد زائد واحد يعني وزارة مرتبة وكمان زيدلهم واحد بيصيروا جمعية بتبطل وزارة والمخفي اعظم وبالنسبة للأقتصاد يا سيد بفهم كمان لما كان العشرين دينار يشتروا دلم وطاه بعبدون وهسا بيشتروش تنكة زيتون
لا انا بفهم بالماركسية ولا بالشيوعية ولا باي حركات وإن كانت دينية او غير دينية ولا باجي بسب على شي رمز لأي جماعة شو بدو يزيد من عمري ولا ينقص ما انا كافي خيري شري بصحا الصبح بقول يا الله وبتوكل على شغلي وبس اجي انام بقول يا الله كمان شو بدي احسن من هيك وبوجعش راسي هذا إذا عرفت انام من بالي اللي بضل يجي ويقلق منامي

بيجي على بالي كثير اشياء ليش الواحد دايماَ موجع راسة وبدافع عن قضية ممكن تكون مهمة بالنسبة لكثير من الناس وبنفس الوقت مش مهمة ولا بتعريفة لغيرة مثل قضية انفلونزاالعصافير
يعني انا بتفرقش معي لأني انسان دون الحد الادنى اني اكل جاج ولا حمام ولا بط طب يعني انا بطلت تفرق معاي من لما صرت ارد شعري لورا وبعد اكمن سنة بتبطل تفرق لأنه رح يكتوا باقي الشعرات
ولا لما صار جنون البقر ولا حتى لو نص العالم انتحر ما انا مبسوط بعيشتي انا وقديشتي وبفهمها مع انها مش دايماً بتفهمني بس يلا اهو يوم وهيعدي واللي يقدم السبت يلقى الحد قدامه وكلمه تفوت ولا حد يموت يا راجل عديها بئة ماتفضلش واقفلي على الدقة وبس ناطرني على غلطة على رأي المغنية اللي كل صدرها وشفايفها سيلكون
ما علينا
بيجي على بالي وبيظل يجي بالي لعندي اخر مرة اجا بالي بقلي شو قصتك مبطل اجي على بالك بدكيش اياني اجي
يعني فاجئني بحكية وبلمت مثل حمار الساقية وطفيت التلفون مع انه ما عندي تلفون خفت لا يكون سامع مكالماتي مع صديقي اللدود علي وانا بقله يا زلمه لويش شركة الخلويات الفلانية رفعوا اسعارها وانشغل بالي من وقتها على الموضوع مع انه انا ماليش لا ناقة ولا جمل
اي انشالله بيصير الشركات الاخرى اطقع كمان مش رايحة إلا على الشباب الفلتان اللي السيد الوالد بيعطيه عشرين دينار كل طالع نهار والماما بتعطيه قدهم لأنه حبيب الماما وما بدها تكسر بخاطره فا اخونا بشحن اله والها مشان ترنله السنفورة وخلي الشعب يعيش – ولا ما بدهم إلا بربيش يتقطع على جنابهم – ويشحن ....

قلتله لا بدي اياك ولا بدي اياك تيجي يا عمي انت من طريق وانا من طريق روح انت احكي عن كل المذاهب وانا مش ذاهب
روح احكي عن السياسة وعن المعتقلين وانا مني وعلي مش ناقصني انه تيجي عندي واقلك بديش اياك كمان تعن

مهو كان زمان يجي ويعن ويعملي قلق بلا بال بلا هداة بال بلا بالي مشغول

بدي ابقى اميل على السوق الشعبي بركي لقيتلي بال او سيكام او نتي اف اس صيني بشي ربع دينار واقعد وارتاح واللي بدو يشغل باله يقرا هلمقال ويفضفض يا عندي يا يروح يشفله شي ثريتد يقعد فيه ويقرأ العجب العجاب يا صحاب

كانوا بالجيش زمان يشغلوا البال بتلميع البسطار ويغنولوا كمان
بسطاري يا بسطاري يللي شاغلي بالي
طول الليل المع فيك للتفتيش الاداري

للحديث دائماَ هناك بقية