خروج عن النص _ كمشة اشياء

يعني الموضوع مش انه لأنه هوه احسن منك ولا انت احسن منه لأنه مافي حدا احسن من حدا وكلنا رجلينا بالفلقة واللي بياخذ امي بقله يا عمي والمي بتكذب الغطاس وفخار يكسر بعضه , خربت عمرت حيد عن راسي بسيطه , واللي طلع الجمل فوق السطوح هوه يروح ينزله مش ناقصني يحرن الجمل وهات قطبها
الموضوع يا سيد انه الوضع مش متحمل وهوه نفسه كان متأمل انه يصير الوضع احسن من هيك بس حساب السرايا خالف حساب القرايا
بيجيك عبو غفله جارك العزيز وبقلك اشلونك يا جار انشالله مبسوط وامورك تمام وكيف الصحة واللازم منه من الكلام اللي ما اله طعمة اصلاَ لو كان في اله طعمه ما كان لما شافك الاسبوع الماضي عمل حاله بحكي تلفون وكأنك مش جاره ولا بعرفك او انك عدوه اللدود وجاي اليوم عبو غفله ذوبت حب فيي وتنظم اشعار بسؤلك عني وعن صحتي واخباري اللي انت اصلاَ بتتمنى اني اكون في الحضيض ووضعي زباله مش مشان اشي بس بدكيش اكون مرتاح لحتى تضلك تنكد على اهلي بسؤلك عني ما علينا هات من الاخر وقص وسلينا شو عبال الضيف ؟ انه يا جاري انت مين بدك تنتخب السنه ؟ سجلت هويتك مشان انتخابات البلدية ؟ عارف مين بدك تنتخب ؟ شو رأيك بفلان اللي كان والله انه مش ولا بُد وخرب كثير والخ الخ الخ من الكلام وانا فاغر فمي ومدندل اذناي ومش عارف لهسا شو بده
ايوا انا بعد طول انتظار يا سيد مش رح انتخب حدا لأنه كلهم سواسيه يعني ما رح يروح زيد العاطل ويجي عبيد الروعة المقطوع وصفه واللي بدو ينشل الوضع وانه ها اجا الرجل المناسب ذات فيت ذا بليس اند هي ويل دو هيز بيست تو ميك ذا سيتي لايك سان فرانسيسكودقت الحج علي مكلهم نفس القصة ماشين تحت شعار اهبر واهرب واللي بيجي بعدي يهبر اكثر مني لأني اكثر من هيك بقدرش اهبربقعد الواحد فيهم كل الوقت بعملش دهان لشقفة بلاطة من رصيف وحتى نقطه دهان وبقدرة قادر بس بدو يسلم البلدية كل المشاريع بتشتغل بدهن وببلط الشوارع وبحط اشارات وبعمل يافطات تعبي البلد مشان يتركها ولا اللي بترن مشان يتركها مشنشله بالديون وما حدا بعده يقدر يوقفها على رجليها اي فوكنا منهم يا زلمه وقلي انت شلونك ؟ والله انا كنت جاي اقلك انه بدنا صوتك لأبن عمي لأنه نازل السنة وعلمك بدنا مجهودك انت حبيبنا ولازم توقف معنا .ضحكت وتأملت كثيرا ما سردت له من قصص وتذكرت الحملة الوطنية للبتراء وان احدهم طبل مخي للتصويت لتكون البتراء من عجائب الدنيا السيع وانا رفضت ان اصوت وقلت بالحرف لو ابوي بده يصير من عجائب الدنيا السبع لن اصوت له لعبة سيئة لجذب الفلوس من المواطنين والشعوب الهبلة وما حدا كسبان اشي منها إلا شركات الخلويات واكمن راس كبار اصلا يعني انا كمواطن كثير رح انبسط لما تصير دخوليتي للبترا الضعف عما هي عليه الأن ولا قنينة المي بدها تصير بحق تنك مي الله يا بلد ما اكثر امورك