خروج عن النص _ فضفضة نفسية

احياناً تخطر على بالي أشياء ,, تتكون في حروف وتتبلور في كلمات لترتسم فوق السطور كـأنها رواية لمراهق جاوز الستين فالمراهقة لا حدود لها وما اخطر المراهقة ما بعد الستين وكأنك تمسك بالسكين سترجحك ولو بعد حين
أشعر واحس احياناً بأشياء لا اعي ما هي ولا اعلم كيف اصفها ولا اعلم أيضا كيف تأتي كلماتي وتصطف جنباً إلى جنب لترسم جملة مفيدة وحتى إن كانت بعيدة عن الموضوع فهي بالنهاية ستكون في موضع من المواضع جزءاً من احد المواضيع ,,, ويتبادر لذهن القارء بأنها خرافات لأنسان يعاني من الخرف المضني ,,, بهدلته هذه السنين أو السنون لستُ بضليع باللغة العربية ولا حتى استطيع أن ارسمها باللغة المحكية فقد أصبحنا تنتناغم مع الحروف والكلمات الغربية
هاهي تتمايل على التلفاز كلوح من القزاز على مرئ الملايين من المشاهدين المتعطشين لرؤية الاجساد العربية التي باتت تسوق منتجات السيليكون الاجنبية والغير أجنبية بتنا نحمل بأجسادنا اشياء غربية كانت لدي قناعة بأننا لطلما نحقن ادمغتنا فقط بالأفكار الغربية فنحن لازلنا بسلام وسننتصر على من يعادينا وحنا للسيف للسيف وما إلى ذلك من شعارات وكلمات معانيها قادرة على غزو سور الصين العظيم –وكأن بيننا ألف صلاح الدين- وتحطيم الامبراطورية والفتك بكل اشكال الطغيان فما نحن إلا بحالة سبات مؤقت وسنفيق بعد حين
الأن ومنذ فترة ليست بقصيرة مسحت هذه الفكرة وسأمحو كل ما افكر به من تقدم ورقي وحضارة لمواطننا فلطالما نحن مركوبين سنبقى مراهقين مابعد الستين وسنبلع يا صديقي السكين
زوبعة في فنجان والشعب العربي الغلبان سيخسر الرهان كما خسر العروبة والاوطان
تتشت الافكار في أي حوار وعند كتابة أي شيئ عن العروبة والعالم الذي أنتمي انا له أُصاب بغصة وتتحجرش كلماتي لا اقوى على ان اكمل كلامي لعلمي بأني اُصيب نفسي بألم اكبر ويكبر الألم عندما ادفنه ,, انا حقيقة لا ادفن الألم لكن انا مجرم لأني اقتله وهو في طور الولادة لكن ما الأفادة فمن سيأتي بعدي سيزيح كتاباتي ويُكتب على شاهد القبر - مات هذا المواطن من التفكير المضني- مات لأنه مريض بحبه لعروبته التي كانت تضيع في الملاهي مع السادة والساسه سأوصي بأن يوضع على شاهد قبري بأني كنت أنا فقط اشرب القهوة سادة ولا صلة لي بالسادة الاوفياء الساهرون على مصلحتنا نحن المغلوبين على أمرِهم وبعد ان قُضي أمرهم ناموا مُرتاحين في القبور وتحت الصخور ولم يستطيعوا الزواج لغلاء المهور وماتوا غرقاً لأنهم لا يملكون رخصة للعبور نحن فقط نملك الشعور يا ايها السادة وستشربون في العزاء الكريم من قهوتي السادة ايها السادة وستأتون لعزاء الموجودين على روح الفقيد الراقد في الدار الاخرة لا لتترحمون على روح الفقيد وإنما لأن صناديق الانتخابات تحتاجكم فلم يكن يوماً أن اختلطت بهولاء السادة فهل بالاعادة أي إفادة .... كلا لا إعادة

خروج عن النص _ كف العفريت

مجنون رمى حجر بالبير ألف عاقل ما طلعوا
هيك بقول المثل .. مع اكمن نقطة وراها بتبين كأنوا في شي ورا هلكلمة .. يا سيد لا كلمة ولا غيروا بس كما هو متعارف عليه الامثال هي من تجارب الاجيال ولولا ماكان في مجنون بشي قرية رمى شي حجر والتموا اهل القرية كلهم تا يطلعوا الحجر مع انه بدون قيمة وكان صاحبنا أبو الامثال قاعد على سحارة عنب مخمجة وبظرب على سيجارة الهيشة وشاف هلناس كلها متجمهرة ما كان مشي معاه هالمثل ولا صرنا نتغنى فيه , ونعترف بانه دائما الذي يغلط هو اكيد المجنون
يا سيد إفرض انه هو الوحيد العاقل ,,, وكل اللي اجوا يطلعوا الحجر مجانين وصاحبنا ابو تُركي المهستر اللي بيبيع قضامه مغبره بعشر قروش وبنسرق بالنهار بشي عشرين دينار قول اكثر مش عارف راسة من رجليه ونطق هلكلمة وكل اصدقائنا اللي التموا حولين البير بلشوا يتغنوا فيها وذهبت مضرباً للأمثال
زمان لما كنا وكان الشيئ بالشيئ يذكر يعني تقريباً هالجملة مش كثير راكبة على بعضها وحتى لو ركبت بدك مين يدفع الاجرة عنها مهو مش معقول شو قاعد بقول إنه الحرامية كثرانه بالمنطقة , والمنطقة على كف عفريت ولما تسمع هالكلمة بركبك الف جني وجنية , طب معروف أي إشي على كف البني أدم مُعرض للسقوط , فا كيف لما يكون على كف العفريت , يعني كالذي يلعب بالكبريت والنار بتحرقلك صوابيعك واللي بيشتريك بالغالي يرخصلك ويقعد قبالك ويرقصلك , كل داه يا مُرسي مش مُهم المهم انه هالعفريت زهق كل هلسولافة واتضح بأن العفريت هو من يقبع على كف المنطقة
قرفتوا ثوبه , لعنتوا سنسفيل اهله , ولسا بتتهموه انه حاطط المنطقة على كفه أنا شخصياً بلشت احب هالعفريت المتهم سابقاً بوضع المنطقة على كفه , اقل مافيها يا سيد هالعفريت له يد واحدة نحنا عليها والثانية ابصر على أي منطقه حتى لو كانت شوي حساسة , بعتذرلها بكل أدب وبقلها حقك على راسي يا منطقة , يا ريت يا سادة تكونوا مثل هالمتهم وتخفوا نهب وسلب ولعانة حُرسه كائنن من تكونون فقد طفح الكيل على قولة ابو تُركي المهستر صاحب الكلاتشية المصيبن

خروج عن النص _ 1977

يعني احياناً تكون القريحة مليحة ومفتوحة للكتابة حتى لو فيها نوع من الكأبة بس يعني مادام الاصابع تطبع والافكار تسطع والحروف تأتي من حيث يصنعها الافراد الساهرون والسائلون عن مصلحة المواطن الغلبان الذي لا ينام لا لشيئ انما لخلو جيبه ومعدته واشيائه …. الكثيرة كثير يقولون يا زلمه مالك نازل بالمسئولين ومش عاجبك العجب ؟ طب يا سيد مش عاجبينك لا تتطلع عليهم وعلى افعالهم .. سيبك منهم الله بتولاهم … وانا عم احاول اقنع هالناس اني انا مواطن وجزء من هالبلد مش رح اقعد واقول – حط راسك بين هالروس وقول يابلح زغلولي - يعني بجوز متفرقش كثير مع الناس إذا انا هون ولا بالمكسيك بس ياعمي- انا حمار - مخي لما ركب كان شمال العوج مليح بس للموز الاصفر واللوز الاخضر ممكن يكون مليح بنباع احسن وبسعر افضل من ان يكون مستقيم وأنا انسان مستقيم ولا اسوى بحساباتهم شيئ يلا طلعلنا شيئ احسن من ولا شيئ لست انا محور الموضوع ولا محور الاهتمام بقدر ماهو هذا الانسان المواطن الغلبان أو من يعاني من هؤلاء الغيلان والحاله وصلت حد الغليان قبل يومين كنت في المدينة الطبية لبعض الاشياء ورافقني صديقي – علي - يريد احضار ورقة تُثبت بانه ليس مؤمنا صحيا بمرافق المدينة كي يحصل على تأمين المدرسة الحكومية مكله تأمين والسلام يعني احيانا بعض الاشياء إذا لم تكن رسمية مية بالمية بتخرب البلد كلها ما علينا طبعا صديقي اتشحشط مشان الموظف في المدينة فقط تكتك عالكمبيوتر الرقم الوطني وتبين انه غير مشمول واعطي الورقة وكل اشي تمام و100 بالمية واحيهم لسرعة انجاز المعاملة الهاملة اللي المفروض ما يطرق مشوار من اربد لعمان بس مشان هيك اشي … حطولكو كمبيوتر مربوط بسجلات المشمولين في تأمين اربد الصحي وجيبولكو موظف عسكري إذا مش مأمنين حدا يطلع فلته زمانه ويعمل هاكينج لسيرفر المدينه الطبية … يا عمي اعملوله الداتا بيس ريد اونلي وات ذات ول كوست يو … مان اتس سمثينج ميكس مي انجري .. اني وي يعني فكرت وشطحت بتفكيري مع صديقي اللدود وقلت لو مثلا واحد عايش بكالفورنيا ولا بديترويت وبده ورقه مثل هالورقة معقول يشمط مشوار عواشنطن دي سي مشان يجيبها … يا عمي اخترعوا التركتر – التركتور - مشان يريحوا الحمار ونحنا مصرين على انه هالحمار مدامه ما بشكي الله لا يرده خليه يتعب طب يا سيد إلى متى سنبقى في المركزية والحضور للعاصمة من اجل ورقة اعي بانه يمكن اصدارها على الاقل من المستشفى العسكري في اربد …… وصدقاً لن تكلفكم شيئا من هذا العناء وشحشطت المواطن اللي كلفته شي عشرة دنانير على الاقل روح وتعال وهون وعندي ومش عندي وعلشباك الثاني وهناك عند هذاك الموظف والموظف طالع او عم بنازع او مجاز او بالفراش أو بالحمام وبشرب دخان ,,, هنا قرأت لافته من روعتها قلت ما اجملك يا بلد وما اكثر القوانين وصدقا لو طبقت هذ هالقوانين لكنا في احسن حال وضحكنا مليا ومن رأنا اعتقد بأننا مهووسين ومن مراجعين العيادة النفسية ملصق على كل اروقة المدينة داخل العيادات .. يمنع التدخين في المرافق العامة بموجب المادة كذا سنة 1977 تحت طائلة المسئولية .. مش معقول يعني التدخين ممنوع في بلدنا من سنة السبعة وسبعين ؟؟؟؟ طيب روعة هالقانون بس أين التطبيق ولا القوانين وضعت فقط للملصقات ؟ الم يحن الوقت لتوفير هذه الملصقات والشعارات التي تجعلك للوهلة الاولى بأنك تعيش في المكان المثالي الخالي من الاوبئه وتكتشف بالصدفة التي دائما لن تفاجئك مُطلقا بانك في المكان الامثل لقراءة القوانين وحفظها دون التقيد بهاأتى على خاطري أن يأتي احد المراسلين ليصور اللافته ويكتب تعليقا عليها إلى متى هذه الظاهرة التي باتت ظاهرة

خروج عن النص _ يا رئيس البلدية

كل اشي ممكن ينفهم ويكونله تفسير حتى ولو تفسير صغير بحجم الاصبع الصغير مش مهم قديش التفسير كبير او صغير المهم في تفسير حتى لو انه مش مقنع بس يعني اشي ومنه واللي منه احسن منه ما علينا يا سيد المهم الموضوع ومافيه انه بتقدر تفهم اشارة المرور جيداً وبتقدر كمان تفهم اشارة امامك مطب وامامك منعطف خطر او احترس ممر مشاه - يعني دير بالك – وما الى ذلك من اشارات كلها تصب في انك ستفهمها لاحقاً او في وقتها لا يهم المهم انك ستتدارك الامر ... ما يؤرقني وما لست افهمه اطلاقا لما وضعت اشارة التنبيه - منطقة انهيارات – ( على طريق اربد –عمان ) طب يا سيد انا ايش اعمل يعني هل من الممكن ان تنهار وانا اسير هل يجب الاسراع في المشي على الميه وستين مثلاً ؟؟ طب اخفف ولا ايش اعمل انا بالزبط ؟ هل اصاب بالاحباط لأنها ستنهار !! يعني اقل ما فيها يا قائمين على هلمشروع الضخم اللي ميزانيته كلفت اكثر من - خمسمية دينار - او يزيد بقليل حطولكو شي حيط استنادي محرز بلا من هلحيطان أو – الحيتان – إذا صح القول وبلا ما يكون المواطن هو الرهان يعني يا سيد في انسان وفي رُعيان بالمنطقة وفي شلايا غنم بترعى بس يعني حتى لو غنمه نزلت تحت هذا الرُكام اكيد رح نحزن عليها مش لأنها هبلة وما بتعرف تقرأ ما يكتب بني الانسان على الاشارات بس لأنها ما بتتوقع انك يا سيد يا فهمان تترك الانهيارات وتقول معلش مهو كتبنالهم اشارة مرور انه ديرو بالكو يا مواطنيين هون الانهيارات بتصير – تقول بركان فيزوف

حسرة علينا وعلى سيرة اربد وعمان يعني انا اذكر انه من سنة الاثمانين وطريق اربد – عمان مغلقة يعني كلها سبعين كيلو مش محرزة كل هالوقت تسكير مرة اربد ومرة الزرقا ومرة عمان يعني بتحاول تفهم كيف في هاي واي ان ذا يونايتد ستيت ولا بلاش نحط حالنا بمقارنه مع اليونايتد خلينا على قد حالنا طريق ومش عارفين تكملوها اخترعولكو شي طريق ترابيه نمشي فيها وخلاص يا سيد مش ضروري تعملولنا طريق حسب المواصفات والمكاييل التي ترضي اهوائكم واهواء منافذ جيبوكم الطليقه التي لا حدود لها ... يا سيد

تفهم وافهم انه في انتخابات بلدية وقروية ونيابيه وابصر شو مش مهم مين تنتخب يعني حلو تمارس حقك الوطني وتدلي بصوتك مع العلم انا ما بدلي بصوتي ولا بشارك بهيك اعراس ... مش لأني مش وطني ولا لأني ما بحط علم بلدي على سيارتي وما الى ذلك من وطنية غالباً ما تكون زائفة واغلبها للنفاق الاجتماعي ليس إلا ... مش معناتو اني ماسوني ولا دخيل على الوطن بس يا سيد كل اشي واله حدود وحضرتك يا نازل للأنتخابات يعني بدل ما تعبي الدنيا بصورك وصورت سيادتك – تقول جورج كولوني ولا براد بت ولا توم كروز دخان- منتا وجهك بضحكش للرغيف السخن وهسا متصورلي تقول رجل في قمة الاناقة والشياكة – هسا طالع من ايف سان لوران - اللي وين ما اروح بشوفها بصباحي والسيد فلان ابن فلان الفلاني وركزلي على الفلاني لأنهم رح ينتخبوك بس مشان عشيرتك طب يعني انا بدي مثلا اروح عالبلدية واقعد ادور على حسب ونسب ولا بدي انسان يفهم ويمشيلي مصلحتي المتعطله من كذا وقت لأن ابن العشيرة الفلانية على عداوات مسبقة مع عشيرة قرابة قرابة ابن جارة خال ابن عمي ,,,, طب انا كان نفسي اشوف على ورقة اقل ما فيها بيان انتخابي يعني يحمسني انا كمواطن ماليش لا ناقة ولا جمل اني انتخبك أي سبعك وسبع اللي بدو ينتخبك على جمال عيونك تقول مقطوع وصفك ... ولا عم تدور على عروس ... نسيت ان تُضيف هاتفك الخلوي يا سيد مشان المنتخبين المظلومين والذي ستنقلب الاحول بعدها ولن نرى صورة وجهك وسوف تفرض غرامة على كل من يضع مُلصق في الشوارع وعلى اعمدة الهاتف يا رئيس البلدية

خروج عن النص - جاجاتنا وجاجاتكم

والله واجا الوقت اللي صارت اغنية جاجاتنا وجاجاتكم يرعن سوا اغنية من الممنوعات وبطلت تقول بتكاكي عنا وبتبيض عند الجيران لأنه إذا شافوها الجيران بتبيض عندهم بدهم ينسفوا اهلك وعشيرتك تقول جاي تبيض كيس هيروين

يا عمي خذوا جاجاتكم وابعدوا دخيل رجليكوا انا !! بعد ان كانت تحتل مكانة مرموقة في اعراسنا واهازيجنا الشعبية ستئول إلى الانقراض وستعدم هذه الاغنية لا لشيئ بل لأن الرعي بالدجاج- وسوا كمان - اصبح ممنوعا وتحت طائلة المسائلة القانونية

انفلونزا الطيور اصبحت شيئاً واضحاَ للجميع واصبحت تقض مضاجع الجميع الذي يدري والذي لا يدري وبقدرة قادر اصبح اكثر 90% من شعبنا يعي ان هناك مرض وفيروس وسيتحول إلى وباء إذا تطور هذا الشيئ يعني وبتقدر تقول صار عندنا من الاخصائيين ما يكفي اكثر من المعينين في وزارة الصحة الامريكية نفسها

فهم هؤلاء نفسهم الذين اصبحوا وبقدرة قادر يعرفون خفايا سوق الاسهم ويتلاعبون بالبورصة ويبيعون ذهب زوجاتهم لأن البورصة لعبتهم - ولو - منحنا اكثر شعب متطور ولدينا العقل الجينيص بهيك أمور ولما صار وضع البورصة تحت الانقاض اللي مات واللي انجلط واللي انتحر واللي صار بدو يباطح الدولة وبدو الدولة تيجي تبوسوا من بين عيونوا وتقله اتفظل خيو حقك علينا ... طب يا محترم لما حضرتك بعت ذهبات المرا واكمن دلم وطاه واشتريت تلفزيون خمسة بوصة مشان تضلك ملاحق الشريط – حسب ما اسميته – الظاهر اسفل الشاشة وبطلت تعرف تعطي حصص الطلاب يالشكل المناسب ويا ويل الطلاب إذا السهم نزل
قلي لويش لما كنت تربح ما كنت تشاطر الدولة ارباحك

زمان لما كان البني أدم عايش – عيشة كريمة (وتحت نير الاستعمار )- قبل شي ميتين سنة اوأكثر اقل بقليل وقبل ما تصير الدول دول وقبل الاستعمار – على اساس انه ما كل حياتنا مُستعمرين – يلعن ابو الاستعمار والاتراك والانجليز والامريكان هذول حكمونا شي خمسمية سنة لما زهقوا ولقوا انه نحنا ناس مش فارقة لا استعمار وغيرو – مع وجود بعض الشواذ الذين كانوا يدافعون عن بلادهم لدحر الفرنسين والبريطانين – لا تخلو الامور .. كان هذا البني أدم يربي المواشي والدواجن للأكل ولأنه مكانش لا سيفواي ولا هابي ستورز ولا كان في كي إف سي (حتى اسمه ذات اي ونت تو فارت )ولا ماكدونالدز ولا كان في مزرعة دحمان لتربية المواشي ولا مزرعة فرقوع للدجاج اللاحم وكبس المخلالات وكان يربيهم مشان ياكل لحمهم ويشرب حليبهم ويعمل صحن عجة بالبيضات بس خلاص

بس يعني مش من المعقول انه لسا في ناس بتربي الحيوانات الزريفة الاليفة اللطيفة جوا البيوت والولاد بلعبوا مع الجاجات وبيصيبهم الامراض مش بس انفلونزا الطيور يعني مهو في اكثر من نوع مرض واغلبها امراض تصيب الجهاز التنفسي ,,, ولما تيجي الدولة من باب الحرص عليك انت اه انت يا مواطن وتقلك تخلص من الجاجات بأسرع وقت لأنه المرض قاب قوسين أو أدنى منك ومن ولادك ومن كل اللي حوليك إفهم يا محترم ودبر حالك خلال يوم واحد مش تضلك تسب علحكومة لأنها السبب انه بدها تقتلك جاجاتك وتصير تقول لأ انا جاجاتي ما برعن سوا مع جاجات جارنا سعداوي لأنه انت بتكرهه وبتأخذها مسئلة شرف وهتك لأعراض الدجاج المسالم
ماتخدهاش سيادتك مسئلة شخصية
يعني بدك تضحك على مين ولك بتقول انك سلخت الجاجات وحطيتهم جوا قمقم ومحدش شايف
ولك يا اخو الشلن والديك اللي داوش مخي كل يوم الفجر ؟ شو هاظ زمور سيارتك ولا صدى الصوت على فراقه صرت
حضرتك بداله تكاكي
وانا من قهري اكاكي على سوء الحال
ودوام الحال من المحال
وسلامة عماركم

خروج عن النص _ لد عالبقرة

مثل ما بقول المثل

لا الذيب يموت ولا تفنى الغنم

بتيجي تا تعمل اشي جديد بتلاقيه معمول أو كعك بعجوه مش مهم المهم المبدأ , المبدأ اللي الكل مش ماشين عليه وبس تسأله بقولك عفواً بس هظا خارج حدود مبادئي , وك يلعن ابو صباح مبادئك شو هلمبدأ اللي هلكتنا فيه وانت بتبيع أبوك اللي رباك وعلمك على لعبة شدة وبتطلق مرتك على سبيل الدُعابه ليس إلا .... وبتضحك ضحكه صفراويه مخمجه مثل وجهك , أي سبعك وسبع هيك مبادئ ما الها بالدهر عازه ويا سيدي افرض انو اجا يوم وعتزناها مادامها داخل حدود مبادئك بدناش كل هلتجره , حسرة عنصرة وما راحت الا على اللي راحت عليه .... طب يا سيد اكيد بدهاش تروح الا على اللي راحت عليه يعني معقول تكون راحت لعند واحد ثاني مش هوه المقصود وماراحت عليه وارتاحت عنده ؟

كل يغني على ليلاه وانا على الروزنا اُغني , محجوب عن الجميع ولكم مسموح أن تطلعو عليها , والدنيا حر الدنيا انا عايزه اخرج اتفسح . تنتهي إلى هنا المأساة وتبدئ المأسي والدنيا كلها مش من مقاسي , لم تكن على مقاسي ابدا ولا على مقاس اي احد فإما ان تضيق وأما أن تـُفرج وتتسع واحياناً تتسخ هذه الدُنيا لأسباب عديدة وأسباب سعيدة وحتى هي نفسها فريدة , فقريحتي أنا هذه الايام مفتوحة على الكتابة ولا اخفيكم احوي بعض الكأبه لكن تبدأ كأبتي عند بداية اول حرف لأي شيئ وتنتهي بسعادة , أكتب وأكتب ولا اعي ما اكتب , سيقرأون ولن يفهمون وسيقرأون ويفهمون وقليل جداً لن يقرأون لأنهم يعون بأنني مجنون , منهم من يُعلقون ومنهم من هُم مُستترون ومنهم لا يعلقون , وقليلون من يمرون ولكن بسكون كصمت السكون .

احياناً يسألونني كيف أكون وما انا عليه من حال كل يوم , يا سيد في عالمنا هذا غيبلك خمس ست سنين وتعا اسألني كيفني وشو اخباري وأيش صار معي اشي جديد , مش كل يوم بدي اغنيلك يا سيد اني منكد ومتضايق وروحي عم تطلع , يا سيد غيبلك اكمن سنه قمريو أو شمسية لا يهم بس المهم تضلكيش تذكرني بالحال اللي انا عايشها , قبل اقل من اربع وعشرين ساعة سألني عن اخباري يعني ما لحقت اصير مليونير ولا شاركت ببرنامج اكسب الملايين وطير البلالين يا عبيط , لا نجد شيئاً لنتكلم به سوى عن احوالنا ما الحال من بعضه يعني على قولة المثل
لو بدها تشتي خبز كانت غيمت عجين
أو لد على البقرة وخذ حليب

خروج عن النص _ انقلع من هون

رفع اسعار المحروقات في مطلع نيسان

يعني الخبر للوهلة الاولى يُعد مع الكذب بكذبات نيسان المتوالية سنة ورا سنة والعمر بيجري أو العمر - بأجري- وفي كان النا صاحب دايماَ بيجري بس ما عمره دخل الماراثون ولا سباق المية متر كان عبارة عن مجرم بحق ولادة بركض النهار كله ومش ملحق عليهم ومات لأنه شريف وولادة ترحموا عليه وقرايبة كان يقولوا عنه حمار ما عرف يدبر حالة ... عاش شريف ومات حمار

يهنياللك على هالموتة

الحمير ركبو سيارات وصاحبنا مشي للقبر بثبات مع بعض من الفتوق في احدى الرئات ... و عنده قًصر نظر مطقع ليس لأنه لم يكن بوسعة الذهاب للطبيب أو شراء العوينات – الكزلك – الشوافات لكن لأنه لم يرى الحرامية وهم يتمتعون بنعيم العدسات اللاصقة – اريحلوا

ليس بجديد على شعبنا المغوار الجاهز لكل الصدمات واللكمات واخرته القبر والممات بكل الاوقات
حسناً يا مواطن نعلم بأنك مشحون على الاخر وكل حياتك منغصات فنحن كحكومة سنفرض عليك شيئاً يغير مجرى الحياة كل اربع اشهر لك جرعة زيادة على المحروقات ويتبعها بعض الزيادات

فعلميا لا تلزمك المحروقات نحن نرفعها كي يدفع اصحاب المصالح الكبرى والعربيات والمحروقات ويلتعن انفاسهم
ولو يا مواطن يا كادح يلي ما انت فلذة كبدنا الايسر اي بدنا نحرق نفس والدة للي بتبطر على النعمة ومعاه عشر سيارات – ومعاه كوبون تعبئة مجاني من الكازيات – وعندة كل الاسهم بأحد المؤسسات
فا يا مواطن هسا انت بدك تستنكر وتعترض على اللي صار ونحنا بدورنا جاهزين لأنه المصلحة العامة تتطلب الرفع ومع احترامي اللك ما رح يتغير اشي

مثل صاحبنا لما رحنا نتعشى بمطعم بقول للموظف مش دوامك خلص فا اخونا جاوب بصدر رحب اه ما انا بداوم اووفر تايم وباخذ على الاوفر تايم دينار ونص
فا قله صاحبنا ووين انت ساكن قله ببيت يافا
فا قله صاحبي وقديش بتدفع تا تروح على البيت قله بدي تكسي كل يوم دينار ونص
قله صاحبي – مع احترامي اللك انت حمار – يعني بتهللك وبتتعب مشان تطلع دينار ونص وبتروح فيهم
فهم المسكين انه مش مستفيد من كل هلقصة اشي وبطل يداوم اوفر تايم مش لأنه فهم لأ خاف حدا يرجع يقله نفس الاشي
يعني مع اختلاف المواضيع تجد النواب الخائفين على مصلحة المواطن مش خايفيين على مصلحة المواطن
اعتقد وجب قلب الاسامي من نائب على مصلحة المواطن إلى نائم عن مصلحة المواطن

قبل اكمن يوم مش متذكر بس يعني بحدود منتصف الليل مروح ولا عند مجمع بنك الاسكان سيارة حكومية موديل الالفين وخمسة إذا مش غلطان مرسيدس لونها ازرق تركوازي يعني ونمرة حمرة وثلاث ارقام كل هالمواصفات مش للبيع خيو كان ابن المسئول الفاضل عم يسحب من الصراف الالي طب هاي سيارة وزارة مش سيارة الدار وبنزينها على حساب عشت وعبيت الدنيا عشوش وياما عشت وياما حتشوف

وبتشوف مثلها كثر ايام العطل وخاصة ايام الجمع على طريق الحمة والأغوار
بدك تطلع يا سيادة المسئول اطلع ما حدا ماسكك
بس يعني شم على حالك وقول المواطنيين بدي اقهرهم اني طالع على حسابهم ... لأنه الطفل الي بيجي تا يبيعك ضمة ورد - صفرا - عملها على ايديه ووقع ميت وقعة وقعة ولسعه النحل وتحمل الحم والبرد وما عنده لا صوبة ولا غاز يتدفى عليهم اقل ما فيها اضحك بوجهه وانت بتقله شكراً ما بدي
وما تقله روح انقلع من هون