خروج عن النص - هيفا مش احسن مني

كل الحق على اميركا ... لأ الحق على الصين .. لأ الحق على الاوروبيين .. لأ يا زلمة شو بتخبص الحق على اليهود ... لأ على الروس .. لأ وانت الصادق الحق على على على ايه اشي بس مش علينا تطلعش فيي هيك لأخزق عينيك
ضحكت
يلعن الشيطان شو انه عديم اخلاق وحريق حرسة
طب ما دام الموضوع هيك يا مدام ما تطلعي لورا وضلك اتطلعي لقدام يعني ضروري سيادتك تتفرجي علب البنت اللي طالعة من بيت ابوها – بس مش رايحا لبيت لجيران - بكيفها وكيف و امهاابوها وتاركه الاواعي – الهدوم -
على الحبل وطالعة بدونهم مادامك انتي لابسة اللي على الحبل بتكفي وبتوفي .... يعني ضروري تسبي والديها وتسبي جيرانها وكل من يعرفونها وبالأخر تشمطي السيارة اللي قدامك ؟؟؟ يا عمي مهو الصحيح الحق مش عليكي برضوا سيادتك .. ما السطل اللي سايق قدامك اطقع منك مهو لولا ما شلخت عقله المستورة ما كان تسمر بأرضة مثل حمار الحقل لما يحرن – الله يسهل عليك يا ابو سامي – ما علينا الكلام بجر كلام مثل ما القمل بجر الصيبان وكل اشي مصالح بهذا الزمان والكلام بسركم مافي اشي صالح لا سيارة ولا عمارة ولا مسئول ولا حد اصلاَ سائل

ضحكت

السيارة وانشطبت والمرا سبت البنت وابو البنت وامها ولحقت – المسبة - اخونا اللي – حرن – وقف مشدوهاً مما رأى والمخالفة واندفعت والمصالح واتعطلت وشركة التأمين والشرطة والحداد والدهين استفادوا وكل الامور ماشاءالله سارت على اكمل وجه والبنت بابا سامحلها والماما كمان سامحتلها البنت مش عديمة اخلاق بس مافيش مين يقلها يا بابا الصرة ممنوع تظهر للعموم وبنطلون – الشطف – اللي للركبة بس بالحاكورة بتلبسية وشعراتك يا حبيبة الماما افرديهم بس بالعقل يعني مش معقول ماشية بالشارع تقولي قاعدة عند الكوافير - الكلتشر – تبعنا ما بسمحلنا نلبس هيك بس – الاكسنت - لو تغيرت وتطعجنا لالكلام اتس اوكي وعروبتنا ما إلها داعي يا اخوان بكرا ببتتغير مع المناهج

ما علينا كل مين حر بحالة
مش هون القصة القصة يا سادة يا كرام انه الناس هاي الايام وبسبب جنون البقر اصابها جنون البشر وبسب انفلونزا الطيور باتت تعيش بين هم القوت وهم ان تتعود على القات ... ليس بوسعهم ان يأكلوا اللحوم لغلائها أمنا وقلنا يلا حجة بحاجة وتعودناعلى الاسترالي والنيوزلندي وبقلك مش بلدي
هيه يا سيد مهو النيوزلندي بنيوزلندا اسمه بلدي وخرفانك اللي عندي بس تطلع لبره بقولولها كمان مش بلدي

يعني خيوو مش ميزة انك بتاكل بلدي – على اساس يعني اللحم ببلدنا كثير نظيف وما بتاكل الخرفان إلا احسن العلف مهيه عايشة على الزبايل وإذا حن عليها صاحب المزرعة بيجيبلها شوية اكل نظاف وإذا طلعت ترعى نص اكلها بكون اكياس بلاستيكية من النظافة البيئية
طب وانا مالي لا باكل لحمة ولا جاج ولا من سكان العقبة لحتى اعيش على السمك ولا مربين على سطح البت عنا فراخ ولا يحزنون .. طب وان صاب المرض اهلنا وصحابنا كمان يا سيد مالكاش دخل – إصمت يا رجل وخلينا في الامور التالتة

وعلى سيرة الامور اللي مش مزبوطة بقلك يا سيد صارت معاي ومعاه ومع فلان ومع علنتان ... ولولا ما لحقوه هناك كان لحقوه ببيت العزا
بتسمع التصريحات على شاشة التلفاز بتنبهر بتقول والله الوضع تمام ومافي اي اش خطير .. بتفوت على المستشفى مشان تسلخ ابرة الانفلونزا العادية – مش تبعت الحمام المسافر – بتلاقي المستشفى يعج بحالات الحمى المالطية أو التفوئيد ولسا انا بأذني قبل ساعات سامع مسئول رفيع المستوى – قال رفيع – اي علي الحلال في جوا بطنة شلية غنم من المناسف ... قال انه ماتم تسجيل ولا حالة تخيلوا يا سادة انه ولا حالة وانا بعيني يعني لا سمعت من زيد ولا عبيد ولا من نطاط الحيط هلقصص شايف الطوارئ تعج بحالات اكثر من الواقفين على سرفيس ماركا الشمالية او الهاشميساني – الهاشمي الشمالي – طب يا عمي ليش ؟
الكذب حبالو قصيرة يا سيد

ضحكت انا وتذكرت حين قال نزار

ضحكت
كان بودي ان ابكي
لكني ضحكت

قبل يومين تم تسجيل اول حالة انفلونزا الطيور في مصر
ثاني يوم طلع شخص بقلك لم يتم تسجيل اي حالة في مصر
اليوم بالجرائد الرسمية – مين رسمية لاحقيتني من محل لمحل - بقلك اربع حالات في مصر أم الدنيا
يا عمي مصر على كل عمارة في بواب وكل بواب جاي من الصعيد يعني حاجة طبيعية جداً انه يكون عنده قفص فراخ على سطح العمارة – واخد بالك سيادتك – ووز والازم منه ... انتوا بتخبوا عن الشعب اية وليه
ولا اقولك – الله يرحمك يا عبد الوهاب – خليها من غير ليه

نفسي ومنى – منى اكيد اخت رسمية – عيني اشوف شي مسئول اجنبي بطلع على التلفزيون وبصرح شي تصريح خطير انه البلد مافيها اشي .. أي بعلقوا مشنقتة قبل ما يسولف

ضحكت
وتمنيت الأن ان يكون لي أذن من البلاستيك وشفايف من السيليكون – هيفا مش احسن مني - ورئة بلاستيكية وقلب حديدي وانامل خشبية وعيون بلورية واكون من كوكب اخر غير كوكب الكذب او على الاقل ان اعيش فيه بمكان إذا مت فيه اموت على مسئوليتي انا ولا اعيش على نفاق الاخرين